په ايران کې د افغانستان 2 زره د تيلو ټانکرونه درول شوي دي

د افغانستان چارواکي او تاجران وايي، چې سرحد ته نږدې د افغانستان 2 زره د تيلو ترانزيت ټانکرونه په داسې مهال درول شوي ، چې افغانستان کې د ژمي موسم او يخني ده.
ايراني چارواکي وايي، چې دغه تيل د ناټو ځواکونو لپاره وړل کيږي نو ځکه يې د وړلو مخنيوی شوی دی. د افغانستان د ماليې وزارت د سوداګرۍ دخونو رياست دغه څرګندونې بې بنسټه ګڼلي او وايي ، چې دغه تيل د عامو خلکو د اړتيا د رفع کولو په موخه واريديږي. د يادونې وړ ده، چې دغه ټانکرونه له دريو اوونيو راهيسې درول شوي دي.
د سوداګرۍ وزير ډاکټر انوار الحق احدي وايي، چې د ايران له مقاماتو سره يې د اړوندې مسالې په هکله اړيکې نيولي، خو تر اوسه يې کوم دقيق ځواب نه دی تر ﻻسه کړی.

په کندز کې ځانمرګي بريد مرګ ژوبله رامنځته کړه

له کندز څخه خبرونه وايي، چې نن سهار اته بجې يوه ځانمرګي بريد کوونکي په کندز ښار کې يوې امنيتي پوستې ته څېرمه چاودنه وکړه. په دغه چاودنه کې يو پوليس اوپه خپله ځانمرګی ووژل شول اوڅلور ملکي وګړي ټپيان شول.

امريکايي خبريال اوڅېړونکی: امريکا د نسکورېدو په درشل کې ده

د پوليټرز جايزې ګټونکی، د نيويارک ټايمز پخوانی خبريال او مشهور ليکوال (کريس هېډجيز) په يوه مرکه کې ويلي، چې امريکا په افغانستان کې جګړه بايللې او د پخواني شوروي اتحاد په څېر مخ په نسکورېدو ده. د ده په وينا امريکايي ځواکونه يوازې د افغانستان په 20 سلنه ځمکه واکمني لري. هېډجيز وايي ، چې د امريکې اقتصادي حالت ډېر ناوړه دی، لوی شرکتونه مخ په زوال روان دي، ښوونيز بنسټونه مخ په ورانېدو دي او که چېرې د امريکې خلک د دغه حالت پر وړاندې مقاومت ونه کړي، کېدای شي امريکا د فيوډالېزم يوه نوي پېر ته ورننوځي.

د بسم الله خان ګومارلي جنرال په ميليونهاوو ډالره غلا کړي

د ملي دفاع وزارت او امريکايي ځواکونو د څېړنو له مخې د 42 ميليون ډالرو په ارزښت هغه دارو درمل چې د امريکې له خوا ملي اردو ته ورکړل شوي وو، د دې پر ځای چې ناروغانو او ټپيانو ته ورسيږي ، شخصي جېبونو ته تللي او غيب شوي. د څېړنو په پايله کې څرګنده شوې چې د ملي دفاع وزارت د روغتيا رييس جنرال احمدضيا يفتلي چې د پخواني لوی درستيز بسم الله خان خاص سړی و، د دغو داروګانو او طبي وسايلو په پلورلو اوغيبولو کې لاس درلود. د ملي دفاع وزارت يو شمېر سرچينې وايي، چې بسم الله خان په دفاع وزارت کې دخپلې لوی درستيزوالۍ پر مهال دفاع وزير بې واکه کړی و او د پيسو په ټولو مهمو ځايونو او پوځي کليدي مقامونو کې يې خپل خلک ګومارلي وو. نوموړی چې څنګه د کورنيوچارو وزير شو، په ډېرې چټکۍ يې د د فاع په وزارت کې همدا پاليسي پلي کړه او په ټولو مهمو ځايونو کې يې خپل کسان وګومارل. د يادونې وړ ده چې د امريکې کانګرس د 2011 کال لپاره د افغان وسله والوځواکونو د پياوړتيا لپاره 11 ميليارد ډالره تخصيص کړي. دا چې حتی د ناروغانو او ټپيانو په درملوکې غلاکيږي ، نو د نورو مرستو په برخه کې به څه حال وي؟

د افغان وسله والو ځواکونو شمېر 250 زرو ته ورسېد

پرون د افغانستان د ملي دفاع وزارت خبر ورکړ، چې د ملي اردو د منصوبينو شمېر يونيم لکو ته ورسېد. د دې تر څنګ د ملي پوليسو شمېر هم يولکو ته رسېدلی. ټاکل شوې چې د ملي اردو هوايي ځواک به هم ډېر زر په خپلو پښوودريږي. د امريکې د هوايي ځواکونو قومندان ويلي، چې ډېر زر به په ملي اردو کې د هوايي ځواکونو منصوبين وکولی شي په يوازې ځان هوايي عمليات ترسره کړي. د ده په وينا اوس مهال د افغانستان هوايي ځواک 56 الوتکې لري ، خو دا شمېر به 156 الوتکو ته ورسيږي. همدا اوس امريکايي ځواکونه د هوايي ځواک په برخه کې څلور زرو سرتېرو ته روزنه ورکوي ، چې ډېر زر به دا شمېر هم 8 زرو ته ورسيږي.

د امريکې کانګرس د افغان امنيتي ځواکونو د پياوړتيا لپاره 11 ميليارد ډالره ځانګړي کړل

پرون د امريکې کانګرس د افغانستان او عراق د 2011 کال لپاره 160 ميليارد ډالره پوځي بوديجه تصويب کړه. په دغه بوديجه کې 11 ميلياردډالره د افغان امنيتي ځواکونو د پياوړتيا لپاره ځانګړي شوي. ټاکل شوې چې تر 2014 کال پورې به د افغان وسله والو ځواکونو شمېر څلور لکو ته رسيږي او ټول امنيتي مسووليتونه به افغان وسله والو ځواکونو ته سپارل کيږي.

د ناټو مشران په افغانستان کې د خپلو ځواکونو د ماموريت په اړه اختلاف لري

په افغانستان کې د بهرنيو ځواکونو (ايساف) مرستيال جنرال جېمز بېکنل وايي، چې ناټو ځواکونه به تر 2014 کال وروسته د افغانستان د ننه په هېڅ ډول جنګي عملياتو کې برخه وانخلي ، خو ځواکونه به يې لاهم په افغانستان کې پاتې وي. په وروستيو وختو کې د ناټو هېوادونو مشران او حتی په خپله د امريکې مشران په افغانستان کې د ناټو او امريکايي ځواکونو د ماموريت د مهال وېش په اړه ګډوډ نظريات څرګندوي او روښانه تګلاره نه لري. څو ورځې وړاندې د امريکې مرستيال ولسشمر جو بايډن وويل، چې امريکايي ځواکونه به د 2014 کال تر پايه په بشپړه توګه له افغانستانه وځي ، دا مهمه نه ده چې هلته څه ډول شرايط دي. د امريکې او ناټو يوشمېر نور چارواکي بيا وايي، چې کېدای شي ځواکونه به يې تر هغې وروسته هم په افغانستان کې پاتې وي، خو په جګړه کې به برخه نه اخلي.